جمعية الأب مجدي تتحوّل مغارة بيت لحم للأطفال المتروكين!

نهار الثلاثاء صباحاً نشر الأب مجدي علاوي على صفحته على فايسبوك خبر عثوره على طفلة رضيعة تركت على الطريق في البرد، فاحتضنها بعد أن باركها وضمّها إلى جمعيته التي استضافت قبل أسبوع طفلاً رضيعاً آخر ترك أمام بابه، وهو ماتيو. كريستا هي الطفلة الاحدث سناً في عائلة الأب مجدي.

وهذا ما نشره الأب مجدي على صفحته:

"بدي قلكن صباح الخير عطريقتي... عطريقة بنتي كريستا يلي لقيتا مبارح بالليل على باب جمعيتنا...

وهيك إبني ماتيو يلي لقيتو الأسبوع الماضي... صار عندو أخت جديدة... هدية عيد الميلاد... مش غريب: "يمكن هيك طلب من بابا نويل"...

كان عندي موعد مع شخصين... وتأخروا على موعدُن... فَ بلشت صلي مسبحتي...

فجأة بسمع صوت بكي ... ضهرت ركض... شفتا عالطريق وحدا... زرقا من البرد... عم ترجف... عم تعيّطلي عطريقتها...

حملتها وباركتها وقلتلا: "بنعمة سيدنا يسوع المسيح... إسمِك كريستا... باسم الآب والابن والروح القدس..."

أخدتا عمستشفى الكرنتينا... وزنا ٣ كيلو... صحتها ممتازة... ما ناقصها غير حرفين بس: "حُب"...

كريستا تعي لقلبي يا بنتي... تعي لتربي مع خيِّك ماتيو الأكبر منِك بأسبوع... تعي نعيّد سوا ونستقبل يسوع المسيح بالمغارة... تعي نكب هموم الدني وما بقى نشوف على مين الحق... إنتي من اليوم بنت الأب مجدي علاوي... ورح إحمل يلي جابوكي عهالدني بقلبي وصلواتي... الله رحوم... غفور... ومسامح...

مورانتاه... تعا يسوع... ملّي الدني بمجد السما... بيقول الروح جايي يسوع... قرّب العيد... عرس السما...

بشكرك يا طفل المغارة! المجد لله".