حرفوش: الأخ نور كان نور بهالعالم المُظلم

"النور بيقتل العتمة …

النور ما بينحجب …

النور ما بيندفن …

النور ما بيموت …

والنور ما بينحط  بالمقبرة …

وإذا حطّو بالمقبرة

تأكدو أنو هونيك بتكون بلشت رسالتو تكون أقوى  وأعظم …

ما بصدق أنو النور فيكم تسكرو عليه …

ولا أنو هالحب اللي كان معبّا الدني رح بيساع بمقبرة …

لأوّل مرّة بشعر لما حطّو الأخ نور بالمقبرة أنو هونيك من هالباب رح يرجع يشع النور والموت يصير حياة

هونيك مطرح اللي بكيو كتار رح نرجع نجتمع ونمسح دموعنا ونقول النور ما بيموت .

وهونيك مطرح لفكرنا أنو الحياة خلصت رح نكتشف أنو الحياة بلّشت …

ولأنو بينا السّماوي ما بيموت نحن ما منموت طالما نحن اولادو ومنآمن فيه ،

رح نحيا معو

لأنو هوّي قلنا أنتو نور العالم

والنّور ما بيموت …

الأخ نور كان نور بهالعالم المُظلم ،

انتشر نورو بكلّ هالدني،

ما تعب وما صابو اليأس ، كان عنيد بحبّو وصامد بإيمانو ، كان صمتو صرخة حق ، كان تاجو حبّ وتوبو الطهر والعفّة …

الأخ نور عشق النور  وما عاد نور الأرض يشفي غليلو لهيك قرر الرحيل للسّما لمصدر النور الحقيقي .

النور أكبر من

هالأرض …

النور أوسع من

هالمدى …

النور ما بيحدّو مكان ولا زمان .

الأخ نور تأكدو ما راح ، هوي راجع ع هالأرض تيعبّي الدني من نور السّما .

راجع أقوى ، إذا بالأرض ما ترك فقير ولا موجوع كيف رح يتركنا وهوّي بالسّما صار أقوى .

النور ما بيموت ولا بينطفي ، النور باقي طالما نحن منحبو وبدنا إياه .

النور مسيرة حبّ والحبّ إذا غمّض عيونو مش يعني ما بقى يشوف لأنو هوّي مصدر النور ، والنور

ما بيموت لأنو الموت بذاتو بيخاف

من النور …"